Беларусь зацікаўлена ў выкарыстанні вопыту Азербайджана ў сферы радыяцыйнай бяспекі - С.Сідорскі
Беларусь зацікаўлена ў выкарыстанні вопыту Азербайджана ў сферы радыяцыйнай бяспекі. Аб гэтым заявіў сёння Прэм'ер-міністр Беларусі Сяргей Сідорскі на сустрэчы з міністрам па надзвычайных сітуацыях Азербайджана Кямаладдзінам Гейдаравым.
Сяргей Сідорскі адзначыў, што міністэрствы па надзвычайных сітуацыях Беларусі і Азербайджана маюць дастаткова добрыя кантакты, дзейнічае сумесная праграма супрацоўніцтва. На думку кіраўніка беларускага Урада, узаемадзеянне паміж гэтымі ведамствамі важна з пункту гледжання нарошчвання патэнцыялу надзвычайных службаў у дзвюх краінах.
Кямаладдзін Гейдараў падзякаваў беларускаму Ураду за прадастаўленую магчымасць навучання азербайджанскіх студэнтаў у Беларусі. Ён таксама выказаў зацікаўленасць у супрацоўніцтве краін у будаўнічай сферы, у прыватнасці, у набыцці беларускіх будаўнічых матэрыялаў.
Цяпер Азербайджан займае шостае месца ў аб'ёме знешняга гандлю Беларусі з краінамі СНД. Па выніках студзеня-лістапада 2007 года тавараабарот з Азербайджанам склаў $81,9 млн. і павялічыўся ў параўнанні з аналагічным перыядам 2006 года амаль у 2,5 раза, экспарт - $79,3 млн., імпарт - $2,6 млн. Характэрнай асаблівасцю беларускага экспарту ў Азербайджан з'яўляецца адсутнасць сыравінных пазіцый, перавага ў пастаўках складаных высокатэхналагічных тавараў. Яго аснову складаюць прадукцыя машынабудавання, дрэваапрацоўкі, прамысловыя спажывецкія тавары, харчовыя тавары.
Беларусь імпартуе з Азербайджана галоўным чынам сельскагаспадарчую прадукцыю і сыравіну. Аснову імпарту складаюць фруктовыя і агароднінныя сокі, баваўнянае валакно, ацыклічныя спірты, памідоры, тканіны з сінтэтычных комплексных ніцей, сувязныя рэчывы, гліны.
У 2007 годзе ў Азербайджане пачалася рэалізацыя шэрага сумесных праектаў: створаны зборачныя вытворчасці трактароў, аптычных прыбораў, грузавых аўтамабіляў, прадаўжаецца работа па арганізацыі сумеснай вытворчасці ліфтаў, пад'ёмных аўтакранаў, сонечных батарэй і іншых складанатэхнічных тавараў беларускіх марак.
Разгорнутая на базе Гянджынскага аўтамабільнага завода зборачная вытворчасць трактароў "Беларус" дала магчымасць ў 6,7 раза павялічыць пастаўкі гэтай тэхнікі ў Азербайджан за кошт удзелу ў рэалізацыі дзяржаўных праграм па падтрымцы мясцовых сельгасвытворцаў.
Стварэнне на базе ТАА "АзЛЕС" сумеснага з ТАА "Гомельдрэў" і ААТ "Пінскдрэў" прадпрыемства "Гандлёвы дом "Беларусь - Азербайджан" дало магчымасць забяспечыць пастаўкі на азербайджанскі рынак прадукцыі дрэваапрацоўчай прамысловасці, сфарміраваць значнае аптовае звяно, пачаць адкрыццё ў Баку магазіна-салона беларускай мэблі.
Адкрыццё на базе створанага ў Азербайджане сумеснага з ААТ "Шклозавод "Нёман" прадпрыемства "АзНЁМАН" салонаў-магазінаў па рэалізацыі беларускага хрусталю дало магчымасць перайсці ад разавых да аптовых паставак беларускага посуду.