Беларусь разглядае ААН як універсальную арганізацыю для вырашэння ключавых пытанняў сучаснасці. Пра гэта заявіў сёння прэм'ер-міністр Беларусі Андрэй Кабякоў на сустрэчы з памочнікам генеральнага сакратара ААН, намеснікам адміністратара Праграмы развіцця ААН, рэгіянальным дырэктарам па краінах Еўропы, СНД і Балтыі Джыхан Султанаглу.

Андрэй Кабякоў адзначыў, што Беларусь займае актыўную пазіцыю на пляцоўцы ААН і лічыць яе адзінай універсальнай арганізацыяй на сусветнай арэне, адзіным інструментам прыняцця рашэнняў па ключавых пытаннях сучаснасці. Паводле яго слоў, адносіны Беларусі і ААН носяць самы цесны характар. Беларусь як адна з дзяржаў - заснавальнікаў арганізацыі займае паслядоўную некан'юнктурную пазіцыю ў падтрымку ААН.

Кіраўнік беларускага ўрада падкрэсліў, што пазітыўную дынаміку адносін ААН з Беларуссю ён шмат у чым звязвае з асабістай уцягнутасцю ў гэты працэс Джыхан Султанаглу. "Мы бачым, як шмат намаганняў прыкладаеце вы і вашы калегі, каб пацвердзіць высокі статус арганізацыі. Бачым, як напружана працуе прадстаўніцтва ААН у нашай краіне", - заўважыў ён.

У сваю чаргу Джыхан Султанаглу выказала меркаванне, што Беларусь за апошнія гады дасягнула відавочнага прагрэсу ў сацыяльна-эканамічным развіцці і гэтаму ёсць шмат доказаў. Напрыклад, нізкі ўзровень мацярынскай смяротнасці. Да таго ж яна адзначыла, што вельмі дынамічна развіваецца сталіца краіны, змяняецца яе знешняе аблічча.

Таксама падчас сустрэчы была дадзена станоўчая ацэнка садзейнічанню, што аказваецца па лініі ПРААН па пытаннях інтэграцыі Беларусі ў сістэму сусветнага гандлю, ўкаранення сістэмы электроннага ўрада, гарманізацыі стандартаў абароны персанальных данных, пашырэння ўдзелу жанчын у палітычным і эканамічным жыцці краіны, павышэння эфектыўнасці выкарыстання электраэнергіі, папулярызацыі здаровага ладу жыцця, прафілактыкі ВІЧ / СНІД.

Акрамя таго, адбыўся абмен думкамі па перспектывах міжнароднага кансультатыўна-тэхнічнага садзейнічання Беларусі па лініі ПРААН.

Асобная ўвага падчас сустрэчы нададзена ўзаемадзеянню па чарнобыльскай тэматыцы ў кантэксце надыходзячай 30-й гадавіны аварыі на Чарнобыльскай АЭС. З улікам таго, што ПРААН каардынуе міжнароднае супрацоўніцтва па Чарнобылі, бакі абмеркавалі распрацоўку новых стратэгічных падыходаў Арганізацыі Аб'яднаных Нацый у гэтай галіне і правядзенне памятных мерапрыемстваў у красавіку 2016 года.

На сустрэчы таксама адзначана зацікаўленасць Беларусі ў далейшым пашырэнні супрацоўніцтва з ПРААН і іншымі арганізацыямі сістэмы ААН сацыяльна-эканамічнага профілю.