На гэты час электразабеспячэнне адноўлена ў большасці населеных пунктаў Беларусі, дзе яно было парушана з-за ўмоў надвор'я і ледзянога дажджу. Аб гэтым паведаміў журналістам Намеснік Прэм'ер-міністра Віктар Каранкевіч па выніках даклада Прэзідэнту Беларусі Аляксандру Лукашэнку.
Віцэ-прэм'ер падкрэсліў, што пытанні забеспячэння надзейнага электра- і цеплазабеспячэння спажыўцоў краіны знаходзяцца на асаблівым кантролі Кіраўніка дзяржавы і Урада. Асаблівую значнасць яны набываюць у перыяд неспрыяльных з'яў надвор'я. Цяперашняе павышэнне тэмпературы да нуля градусаў і значнае выпадзенне ападкаў у выглядзе дажджу, мокрага снегу прыводзяць да абледзянення дрэў і ліній электраперадачы. Узрастае верагоднасць падзення дрэў на лініі электраперадачы, што прыводзіць да парушэння электразабеспячэння спажыўцоў.
Віктар Каранкевіч далажыў Прэзідэнту наконт бягучай сітуацыі ў энергазабеспячэнні краіны, як зрэагавалі Мінэнерга і энергазабеспячальныя арганізацыі на адключэнне ліній электраперадачы, наколькі аператыўна была арганізавана работа па аднаўленні электразабеспячэння. Закраналіся таксама пытанні цэнтралізаванага цеплазабеспячэння населеных пунктаў.
Найбольш пацярпелыя рэгіёны - Мінская, Гомельская і часткова Віцебская вобласці. Паводле даных за 27-28 студзеня, парушэнне электразабеспячэння было зафіксавана ў 475 населеных пунктах Беларусі. На гэты час яно ўжо адноўлена па штатнай схеме ў 450 з іх. У 25 населеных пунктах работы яшчэ вядуцца. А пакуль не падключаны 84 трансфарматарныя падстанцыі, задзейнічаны 4 дызель-генератарныя ўстаноўкі для забеспячэння электразабеспячэння ад мабільных крыніц. "Там задзейнічаны 56 брыгад. Задача - на працягу сённяшняга дня цалкам забяспечыць аднаўленне электразабеспячэння ў гэтых населеных пунктах", - праінфармаваў Віктар Каранкевіч.
Што датычыцца цеплазабеспячэння, то на гэты час работа арганізавана ў штатным рэжыме, адключэнняў па цэнтралізаваных сістэмах не зафіксавана. "Забяспечваюцца надзейныя цеплазабеспячэнне і гарачае водазабеспячэнне. Але прыняты пэўныя меры, накіраваныя на зніжэнне нагрузкі на цеплавыя сеткі. Пры гэтым забяспечваюцца неабходныя стандарты па ацяпленні жыллёвага фонду, адміністрацыйных і сацыяльных аб'ектаў", - звярнуў увагу Віктар Каранкевіч.
"Не больш за суткі без электразабеспячэння. Задача - або аднавіць лінію электраперадач, або падключыць дызель-генератарную ўстаноўку", - сказаў віцэ-прэм'ер.
Ён звярнуў увагу, што яшчэ гадоў 10-15 таму пры падобных умовах надвор'я колькасць адключэнняў ад электразабеспячэння магла быць значна большай. За гэты час рэалізаваны шэраг прафілактычных мерапрыемстваў. У прыватнасці, павялічана колькасць дызель-генератарных установак, па ўсёй краіне пашыраюць прасекі, дзе праходзяць лініі электраперадач, што дае магчымасць забяспечыць больш надзейную іх эксплуатацыю і мінімізаваць выпадкі пашкоджання з-за паваленых дрэў. На лініях электраперадач, размешчаных у лясным фондзе, замяняюць аголены провад на ізаляваны.
"Вялікая работа ў гэтым напрамку ўжо праведзена, што дае магчымасць нават пры падзенні дрэў забяспечыць электразабеспячэнне спажыўца, - растлумачыў Віктар Каранкевіч. - Такая работа будзе праходзіць кропкава або сістэмна і ў далейшым".
Акрамя таго, вызначаны ўчасткі, дзе неабходна пракласці лініі электраперадачы ў кабельным выкананні. "У планавым рэжыме па буйных населеных пунктах для надзейнага электразабеспячэння асобныя рэзервовыя лініі ўжо выконваюцца ў кабельным выкананні. І з'явы надвор'я, падзенне дрэў ужо не аказваюць уплыву на надзейнасць электразабеспячэння", - адзначыў Віктар Каранкевіч.
Яшчэ адна мера - будаўніцтва рэзервовых ліній электраперадач, што дае магчымасць у выпадку адключэння адной лініі забяспечыць перападключэнне ў аўтаматычным рэжыме на іншую, рэзервовую.
"У выпадку неабходнасці 690 брыгад гатовы быць мабілізаваны ў любы рэгіён нашай краіны для ліквідацыі пазаштатных сітуацый. Гэта датычыцца і аднаўлення ліній электраперадач, трансфарматарных падстанцый, а ў выпадку неабходнасці - падключэння дызель-генератарных установак для электразабеспячэння ўжо індывідуальна ад іх (але гэта лакальны выпадак для таго, каб перапынак электразабеспячэння асноўны спажывец не адчуў)", - растлумачыў віцэ-прэм'ер.
